8, ఆగస్టు 2017, మంగళవారం

మెరిసిన కవితాకన్నియ...!!

రెప్పపాటు ఈ జీవితానికి
కనురెప్పల మాటున కలలెన్నో
కనపడని వ్యధల కథలెన్నో

మాటల చాటున మౌనానికి
వినిపించే వితరణ వేదనలెన్నో
వివరించలేని గాయపు గురుతులెన్నో

పెదవి దాటని పలుకులకు
మిగిలిన గుండె సవ్వడులెన్నో
నినదించలేని గొంతు రోదనలెన్నో

పరుగులెత్తే కాలానికి
పోటీ పడలేని జీవనాలెన్నో
ఓటమి ఓదార్పుల వెతలెన్నో

జ్ఞాపకాల గువ్వలలో
గూడు కట్టుకున్న గతాలెన్నో
గాలికెగిరిపోయే గాథలెన్నో

అంతేలేని అక్షర ప్రవాహానికి
అడ్డుపడే ముద్రారాక్షసాలెన్నో
మనసు వాకిట నిలిచిన భావాలెన్నో

ఒలికిన కవనపు చినుకుల్లో
చిలికిన చిరు జల్లులెన్నో
మెరిసిన కవితాకన్నియ హరివిల్లులెన్నో..!!

0 మీరేమనుకుంటున్నారో.....చెప్పేయండి:

Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner