7, డిసెంబర్ 2017, గురువారం

ఏక్ తారలు...!!

1.  ఊరడిస్తున్న వాస్తవ కథనం_ఊపిరై తానుంటానంటూ...!!

2.  ప్రాణ వాయువు పక్కుమంటోంది_అక్షరమే నీ ఊపిరైందని...!!

3.  మరలిపోతోంది కాలం_కనికట్టు మాయలో కకావికలమై...!!

4.  దిగులుకు గుబులైంది_సంతోషం చోటడిగిందని...!!

5.  నిశ్శబ్దమే నచ్చింది_మనుష్యుల మనసు మర్మాలు తెలిసాక...!!

6.  మమేకమైన మనసుల సవ్వడులు_ఓదార్పుకి వారధులు..!!

7.  అర్ధమూ మారింది_నిశ్శబ్దానికి నిట్టూర్పులు మెుదలై.. !!

8.   చెప్పలేని మౌనాలే_మది కోటలో గాథలన్నీ....!!

9.  గుట్టు విప్పని భావాలెన్నో ...గుండె గుప్పెడయినా..!!

10.  పేర్చిన ఇటుకల్లో_జ్ఞాపకాల సమాధులు...!!

11.  రతనాల రాశులవి_జీవించడం నేర్పిన అక్షరాలు...!!

12.  తూనీగలా తుళ్ళింది_నీ తలపులు ఒంపిన వయ్యారమనుకుంటా...!!

6, డిసెంబర్ 2017, బుధవారం

స్నేహానికి మరో కోణం...!!


   

నేస్తం,

        స్నేహం ముసుగులో కొందరు చేసిన మోసాన్ని భరించాక ఈ నాలుగు మాటలు చెప్పాలనిపించింది. ఇంటి మనిషి అని నమ్మినందుకు ఇంటినే అల్లరి చేసి, ఎవరో ఒకరు కాస్త ఆవేశంలో, బాధలో ఆలోచనలేకుండా పెట్టిన దానికి నమ్మిన స్నేహితులని మోసం చేసిన మనిషి తానే మోసపోయానని అనడం చాలా హాస్యాస్పదంగా ఉంది. ఒకరినో ఇద్దరినో మంచివాళ్ళు కాదని అనడం సహజం కానీ ప్రతి ఒక్కరిని ఇంటికి తీసుకువచ్చి వారి వెనుక వారిని చాలా చెడ్డగా మాట్లాడటం కొందరి సహజ లక్షణం. తన అవసరానికి అడ్డాగా నా స్నేహాన్ని, ఇంటిని వాడుకుని పాపం బోలెడు కష్టాలు నా ఇంట్లో పడ్డానని వారికి చెప్పి మరి కొందరి ఇండ్లలో చేరి వారిని అల్లరిపాలు చేసి, కాపురాల మధ్యన చిచ్చు పెట్టి, నా ఆప్తుల మీద నాకే చెప్పిన మా దొడ్డ ఇల్లాలు. తన అసలు రూపానికి తానే నాకు సాక్ష్యాలు ఇచ్చి, ఆత్మీయమైన స్నేహాన్ని అభాసుపాలు చేసిన మహా 'మనీ' 'షి'.  కడుపు చించుకుంటే కాళ్ళ మీద పడుతుందని ఏమి చెప్పలేని అశక్తురాలిని చేసిన ఘనత ఆమెది. తన అనుకున్న వారి దగ్గరే నా గురించి వాగితే వాళ్ళు అప్పటినుండి తననే దూరం పెట్టారు. తాను తప్ప అందరు పాతివ్రత్యం లేనివాళ్లే అని భావించే పతివ్రతాశిరోమణి తాను వాగిన వాగుడు బయటపడుతోందని అందరు ఒకరి గురించి ఒకరు అన్నారని చెప్పడం మొదలు పెట్టి నాలుగురోజులు పబ్బం గడుపుకుంటూ తన ఉనికి కోసం శాయశక్తులా కష్టపడుతోంది. ఇలాంటిదాన్ని, దాని మాటలను  నమ్మినవాళ్లను ఆ భగవంతుడు కూడా కాపాడలేడు. దయచేసి దాని మాయలో పడకండి.  బురదలో పద్మం వికశిస్తుంది కానీ ఈ పుట్టుకలో బురదలో మకిలే ఆభరణం. క్షేత్ర లక్షణాలు బాగా వంటబట్టాయి.
     స్నేహాన్ని వ్యాపారంగా మార్చి లెక్కలు వేయడం, అనుబంధాలను అల్లరిపాలు చేయడం,  ఆత్మీయతను మోసం చేయడం వంటివి వారికి వెన్నతో పెట్టిన విద్య అని తెలుసుకోలేక పోవడం నా తెలివితక్కువతనం. ముఖపుసక్తంలో మంచి చెడు ఉంటాయని మనమే జాగ్రత్తగా ఉండాలి. లేదంటే ఇలాంటి ఎదురుదెబ్బలు తప్పవు. ఒకరి మీద ఒకరికి చెప్పి ఎన్నాళ్ళు పబ్బం గడుపుకుంటారో ఇలాంటి వాళ్ళు. నిజం అనేది ఎప్పటికయినా బయటపడుతుందని మర్చిపోతే ఎలా. పచ్చకామెర్లు సామెత అందరికి గుర్తుండే ఉంటుంది కదా. అదే ఈవిడ నైజం కూడా. చాలామంది నాకు చెప్పారు రెండో వైపు వినకుండా ఎలా అని, నిజానిజాలు తెలియకుండా నేను ఏ నిర్ణయమూ తొందరపడి తీసుకోను. అందులోనూ స్నేహం విషయంలో అస్సలు పొరపాటు చేయను. క్షమ అనే పదం కూడా ఇలాంటి వారికి వాడకూడదు. ఇంతకన్నా ఏమి చెప్పలేను. పెద్దలు, సన్నిహిత మిత్రులు, ఆత్మీయులు ఇచ్చిన సలహాలకి, నాపై చూపిన అభిమానానికి నా కృజ్ఞతలు.
    
నాలాంటి కొందరికి అక్షరాలే  ఆయుధాలైనా ఆదరిస్తున్న ఆత్మీయుల అభిమానమే మాకు అండ. నా కబుర్లు కాకరకాయలు బ్లాగుని గత ఎనిమిదేళ్లుగా అభిమానిస్తూ, ఆదరిస్తున్న అందరికి నా కృతజ్ఞతావందనాలు. తొమ్మిదో వసంతంలోకి అడుగిడుతున్న కబుర్లు కాకరకాయలు పుట్టినరోజు సందర్భంగా నాకెంతో ఇష్టమైన స్నేహాన్ని మరో కోణంలో చూడటానికి బాధగా ఉన్నా మరికొందరు మోసపోకూడదనే ఈ పోస్ట్.     

28, నవంబర్ 2017, మంగళవారం

ఏకాంతం - ఒంటరితనం...!!

నేస్తం,
        ఏకాంతం -  ఒంటరితనం అనేవి ప్రస్తుతం మన అందరితో స్నేహం చేస్తున్న స్నేహితులు. ఏకాంతం కొందరికిష్టమైతే మరి కొందరేమో ఒంటరితనానికి ఏకాంతపు స్నేహాన్ని ఆశిస్తారు. ఒంటరితనం కొందరికి భయాన్ని, బాధను కలిగిస్తుంది. అభద్రతాభావాన్ని ఎక్కువ చేస్తుంది. ఒంటరితనం ఎంత ప్రమాదకారి అంటే ఒక్కోసారి మరణానికి దగ్గరగా తీసుకువెళ్తుంది. కానీ ఏకాంతం అలా కాదు మరణంలో సైతం మళ్ళి బతికితే బావుండుననిపిస్తుంది.
      మన ఒంటరితనానికి కారణం మనమే అవుతున్నాం. మనకంటూ మనం లేనప్పుడు ఒంటరినన్న భావన పొడచూపుతుంది. తన చుట్టూ ఎందరున్నా ఎవరూలేని ఏకాంతానికి చోటిస్తారు కొందరు. మరికొందరేమో తన అన్న బంధాలెన్నున్నా ఎవరూలేని ఏకాకుల్లా ఒంటరిగా మిగిలిపోతారు.కొన్ని స్వయంకృతాపరాధం అయితే మిగిలినవి విధిరాతలని సరిపెట్టేసుకుంటున్నాం.
     ఒంటరితనం శాపమని, జీవితానికి ముగింపని అనుకుంటే మన  చుట్టూ చీకటే ఉంటుంది. ప్రపంచంలో ఒంటరితనమంత పెద్ద శిక్ష మరొకటి లేదనుకునే ముందు భరించలేని ఆ ఒంటరితనానికి కారణాలను తెలుసుకోగలిగితే దాన్ని అధిగమించడం చాలా సులువు. మనకంటూ, మనకోసం ఎవరు ఉండరు మనం తప్ప. మనలోని మనకిష్టం లేని ఒంటరితనం సమస్యను పెంచి పోషించకుండా దాన్ని నాశనం చేయడానికి మన వంతుగా ప్రయత్నించాలి. నాకు తెలిసి ఏకాంతం ఒంటరితనానికి సన్నిహితం. బాధగా కాకుండా ఇష్టంగా భరిస్తే ఒంటరితనమూ ఓ వరమే నువ్వేంటో నీకు తెలియడానికి. ఈ ప్రపంచంలో మనదే పెద్ద కష్టం అనుకుని మన మీద మనమే జాలి పడటం కన్నా దురదృష్టం మరొకటి ఉండదు. ఇష్టంగా భరిస్తే కష్టమూ ఇష్టంగానే ఉంటుంది. ఒక్కసారి అలా అనుకుని చూడండి ఎంత బావుంటుందో మీకే తెలుస్తుంది... !!

జత కలిపేవారెందరు..??

ప్రభుత్వాలు స్వచ్ఛ భారత్ అని గగ్గోలు పెడుతున్నాయి కానీ ఆచరణ ఎక్కడ..? నిన్నటికి నిన్న గన్నవరం దగ్గర శివాలయానికి వెళితే తెలిసిన పెద్దావిడ మా ఇంటికి వచ్చేవరకు ఎంత ఇబ్బంది పడిందో.. అభివృద్ధిలో మునుముందుకు వెళుతున్నాం అని నాయకులు చెప్పుకునే మాటల్లో ఎంత నిజం ఉందనేది తేటతెల్లం అవుతోంది. పార్టీ  ఆఫీసులు,  పబ్బులు, మాల్స్, సినిమా హాల్స్ కాదు సామాన్యులకు కావాల్సింది... ప్రతి ఒక్కరు ఈ వీడియో చూసి మనం ఏం చేయాలన్నది ఆలోచించండి. ఎవరో వస్తారని ఎదో చేస్తారని ఎప్పటిలాగే ఎదురుచూసి మోసపోవద్దు. ఏ రాజకీయపార్టీ ఈ సమస్యకు పరిష్కారాన్ని చూపదు, నిధులు స్వాహా చేయడం తప్ప....
దయచేసి మానవతా భావంతో ఈ సమస్యకు పరిషారాన్ని చూపండి. సుందర్ మోహన్ గారు ట్రస్ట్ ప్రారంభించి ప్రతి ఊరికి కట్టిద్దాం అంటున్నారు. తన వంతుగా 5000 రూపాయలు ఇస్తాను అని కూడా అంటున్నారు. మొదటి అడుగు పడింది. మరి ఆ అడుగులో జత కలిపేవారెందరు..??

https://www.facebook.com/jordarpori/videos/523662558010068/

27, నవంబర్ 2017, సోమవారం

సహజత్వమైన నటన...!!

నేస్తం, 
          సూక్తిముక్తావళి సూక్తులు చాలా ఎక్కువై, మనం పెట్టే సూక్తులు మనకే వర్తిస్తున్నాయని మర్చిపోతూ మనమూ గురువింద గింజలమై పోతున్నాం. మనలో సహజత్వమైన నటన సహజాతంగా మనతో కలిసిపోయిందని ఇతరులు గుర్తించరని అనుకుంటే అది పొరబాటే. మనం మంచివాళ్ళం అని నలుగురు గుర్తించడానికి మనతోనే ఉన్నవారిని అల్లరిపాలు చేయడం, లేనిపోని నిందలు వేయడం, అవాకులు, చవాకులు పేలడం వంటి పనులు ఎంత వరకు సబబు...? 
          వ్యక్తిత్వం పుట్టుకతోను, పెరిగిన పరిసరాల నుంచి మనకు ఆభరణంగా వస్తుంది. మన చుట్టూ వెన్నెలే చిమ్ముతున్నామని మనమనుకుంటే సరిపోదు, చీకటి నుంచి ఆ వెన్నెలను అనుభూతించే వాళ్లకు తెలుస్తుంది ఆ చల్లదనం. జీవితం విలువ తెలిసినవాళ్ళు ఇతరుల జీవితాలను నవ్వులపాలు చేయడానికి ప్రయత్నించరు. విలాసాలు, విందులు జీవితం కాదు, మనలని నమ్మినవాళ్లకు నేనున్నానన్న భరోసా ఇవ్వగలిగితే ఆ నమ్మకానికి వెల కట్టలేము. బంధం అనేది బలీయంగా ఉండాలి కానీ భరించలేనిదిగా ఉండకూడదు. ఆచరణ లేని సూక్తిముక్తావళి అసహ్యంగా ఉంటుంది. అభిమానం అనేది డబ్బుతో కొనేది కాదు, మనసుతో ముడిపడేది. నిజాయితీగా బతకాలంటే చాలా ధైర్యం కావాలి, సమయమూ ఉండాలి కానీ ఆ నిజాయితీని కోల్పోవడానికి ఒక్క క్షణం కానీ, ఓ మాట కానీ చాలు. నమ్మకం పోయిన తరువాత మళ్ళి ఎన్ని జన్మలు ఎత్తినా రాదు. మన పెద్దలు చెప్పినట్లు కాలు జారితే తీసుకోగలం కానీ మాట జారితే వెనక్కు ఎలా తీసుకోగలం..? 
          మనసులతోనూ, మనుష్యులతోను బంధాల పేర్లు, స్నేహ సంబంధాల ముసుగులు వేసి వక్ర భాష్యాలతో మంచితనంగా నటిస్తూ మోసాలు చేస్తున్న ఎందరో మహానుభావులందరికి మా పాదాభి వందనాలు. కాని ఒకటి మాత్రం మర్చిపోకండి ఆకాశం మీద ఉమ్మేస్తే అది మీమీదే పడుతుందని తెలుసుకోండి చాలు...!!

26, నవంబర్ 2017, ఆదివారం

నాలోని నువ్వు పుస్తక సమీక్ష...!!

         సాహిత్యంతో గత 20 ఏళ్లుగా అనుబంధం ఉన్న సాహితీవేత్త శ్రీ మహిది ఆలీ గారు. కథా రచయితగా,
నవలాకారునిగా సాహితీ లోకానికి చిరపరిచితులు. వీరి మనసు నుంచి జారిపడిన అక్షరాల కవితా ప్రవాహం " నాలోని నువ్వు" గా మనముందుకు వచ్చింది. ఈ కవితాసంపుటి గురించి సమీక్ష రాయడం ఆంటే అది నాకు చేతగాని పనే. ఎదో నాలుగు మాటలు నాకు తోచిన విధంగా మీ ముందుంచుతున్నాను.
       ఈ సృష్టిలో అనిర్వచనీయమైన అవ్యక్తానుభూతి ప్రేమని ఆహ్లాదంగా, అందంగా తన అక్షరాల్లో పొందుపరచి మనముందుంచారు ఆలిగారు. నువ్వొక్కదానివే వెళ్ళిపోతే నా జీవితమేమి శిశిరమైపోదు, కానీ వసంతం కూడా ఇక నా దరికి రాదు అంటూ నాలోని నీకై అన్న చిన్న కవితలో నువ్వులేని నేను లేను అంటూ ఎంత గొప్పగా చెప్పారో. నీ  కోసంలో రెండు విషయాలే అంటూ ఓ ప్రేమికుడి ఆత్మానందాన్ని మనకు చాలా అలవాటైన పదాల్లోనే పరిచయం చేశారు. ఇంతవరకు తీయనిది.. తీస్తే తీయనైనది.. ని మనసులో నాపై ఉన్న భావం అని అందమైన భావంలో ప్రేమతత్వాన్ని బహు చక్కగా చెప్పారు. ఇలానే చూడలేమా అన్న కవితలో కూడా తన భావుకత్వాన్ని ప్రేమ పరిపూర్ణత్వాన్ని పలికించారు. నక్షత్రాలను లెక్కబెడుతూ ఉండు .. మళ్ళి వస్తానని చెప్పి వెళ్లిన నేస్తపు నిష్క్రమణాన్ని ఎంత నిశ్శబ్దంగా వెళ్ళిపోయావు నేస్తమా లో చదువుతుంటే మనసు ఓ అలౌకిక లోకములోనికి వెళ్ళిపోతుంది అనడంలో ఏ మాత్రం సందేహం లేదు. ఎ భావాలైతే పెదాలు చెప్పలేవో ఏవ్ కన్నీరు అవుతాయి అని కన్నీళ్లకు ఓ సరి కొత్త భాష్యాన్ని చెప్పారు. నీకెలా చెప్పనూ లో సముద్రపు సాంద్రతతో ప్రేయసిని పోల్చడంలో మనకు అక్షరాలను ఆపాదించిన అలంకారాలను నిజాయితీగా తన మనసులో జనించిన భావాలకు జీవం పోశారు. నువ్వుండకపోవచ్చు అనుక్షణంలో నువ్వు నాతోలేని శూన్యాన్ని నీ జ్ఞాపకాల  నింపుకోవడానికి తపన పడుతున్నానంటారు. నువ్వొక్కదానివే వెళ్ళిపోతే ఎవరు నాతో లేకపోయినా నువ్వుంటే చాలు అనుకునే అమాయకత్వాన్ని అద్భుతంగా చెప్పారు. ఇక తెలిసిందిలేలో ప్రేయసి మనసు గెలిచిన సంతోషాన్ని అందించారు. నా హృదయాన్ని స్పృశించవూ అంటూ చిరు ఆశలని వివరిస్తూ భావాల తడిని మనసు సవ్వడికి ఆపాదించారు. ఆకృతిలో అస్పష్ట జీవితానికి పరిపూర్ణ ఆకృతి ఎలా వస్తుందో మనిషిలోని వివిధ భావాల ముసుగులు పొరల నుంచి పరిణితి చెందిన పూర్ణ వ్యక్తిత్వం ఎలా ఉండాలో వివరించారు. అందాన్ని సరికొత్త కోణంలో చెప్పారు. రా నేస్తమా అంటూ ఇద్దరి మధ్యన సయోధ్యకు సోపానాలు ఏమిటనేది చెప్పారు. అసంకల్పితంగా జరిగే కొన్ని చర్యలను అందరి మనోభావాలేనని చెప్పేసారు. కాగితపు పూలు గురించి చెప్పాలంటే దీని ఒక్కదానికే సమీక్ష రాయాల్సి ఉంటుంది.  నాకు చాలా ఇష్టమైన కవిత ఇది. ప్రేయసికి ఇవ్వడానికి పూలను కానుకగా కోద్దామనుకున్న ప్రియుడికి వినిపించిన ఆధునిక పుష్ప విలాపం అనిపించింది. ప్రతి ఒక్కరు తప్పక చదవాల్సిన అద్భుతం దాగిఉంది ఈ కవితలో. నీ  మనసు, నేస్తమా చూసుకో ,అందం, ఎలా గుర్తుంచుకుంటావు నన్ను, భావ్యం కాదు కదా, స్మృతి మొదలైన కవితల్లో మరపురాని ప్రేయసి జ్ఞాపకాల గురుతులను, పల్లె మనసులో తెలంగాణా యాసలో పల్లె ప్రేమ స్వచ్ఛతను అందించారు. స్వరం, స్మృతులు చెదారావు కదా, నీ మహిమ, అసాధ్యం కదా కవితల్లో తన మది ఆశల రంగుల
కలలను చూపించారు. ప్రేమలో చెప్పిన నాలుగు వాక్యాల్లో ప్రేమలోని గాఢతను చూపించారు. వెళ్లిపోతూ ఉన్నది, నీ  తోనే కదా,  కొన్నిసార్లు, నీ రాక వంటి కవితల్లో కాలాన్ని ప్రేయసి గురుతుల గమనాన్ని అక్షర భావాల్లో ఇముడ్చుతున్నా అని చెప్పడం బావుంది.  మస్త్ యాదికొస్తావే మరో తెలంగాణా మాండలిక కవిత. సాంత్వన, నువ్వెందుకిలా అయ్యావు, ఏమైపోయింది నీకు కవితలలో దూరం చేసిన చెలి ప్రేమను ఎందుకిలా చేసావని ప్రశ్నిస్తారు. గ్యాపకం వస్తావే కవిత మరో ఆణిముత్యం.. తమతో అమ్మలేని దూరాన్ని అక్షరాల్లో కొలిచి నాన్నకు తోడుగా ఉంటామని చాలా హృద్యంగా చెప్పారు. ఏమని కోరను, నువ్విలా ఉంటావు, నీ విజ్ఞత అది, శిశిర దశ, ఇంతకూ మించి ఏంకావాలి కవితల్లో రాలిపోతున్న ఆశల చిగురుదనాన్ని బాగా చెప్పారు. కవిత పుట్టుకను తనదైన మాటల్లో చెప్పారు. చివరి కోరికలో తరగని దూరాన్ని కొలవలేనని చెప్పడం ఆలిగారి భావ ప్రకటనకు పరాకాష్ట.  ప్రేమ విఫలమైతే ప్రేయసి ఆత్మను త్యజించడం ఎంత నిగూఢమైన భావాన్ని నింపిందో కవితలో మనకి తెలుస్తుంది. నీకు నీ జ్ఞాపకానికి తేడా ఏమిటనేది తేడా కవితలో చక్కగా చెప్పారు. ఎలా చెప్పనూ, తేడా ఆమెకు అతనికి ఇంతే, తనే కదా,  స్పందన, తార్కాణం, వేచిచూడు, నిరీక్షణ, వెళ్ళాకనే కదా తెలిసేది, మరవకు, అందం, ఎవరితరం కాదు, సహజత్వం, సందిగ్ధం, అదృశ్య దూరం, చనువు, స్తబ్దత, ప్రత్యేకత, ఏకాంతం, ముత్యాలు వంటి కవితలు ప్రేమలోని దూరాన్ని, దగ్గరతనాన్ని జ్ఞాపకాలతో పంచుకోవడం చాలా బావుంది. మరి ఎలా కవితలో మరచిపోలేని గతానివి నువ్వైతే వెంటాడే జ్ఞాపకాన్ని నేనంటారు. నా జీవితానికి కవితలో తన ప్రేమ పారదర్శకతను నిరూపించుకున్నారు. కేవలం ఇంతే, నిద్ర రానప్పుడు, ఏనాటికి తిరిగి రానివి కవితలు కూడా ప్రియమైన ప్రేమవే. చేయుట ఇస్తారు కదూ కవితలో అమ్మానాన్న వదిలేసిన ఓ పసి హృదయపు ప్రేమ రాహిత్యం కనిపిస్తుంది. అమరత్వం కవిత గతంగా నే మిగిలినా ఓ సజీవ చరిత్రగా నిలబడతానని ప్రేమ సగర్వంగా చెప్తుంది. వస్తాడు ఒకరోజు కవిత ప్రేమకు ధీటుగా రాసిన సామాజిక ఉద్యమ కవిత. భార్య, నిశబ్దం, నాన్న, కోపం రాదా, కూతురు, కోల్పోయినవి, నిజం, ఒక తండ్రి ఆవేదన, ఉద్యోగిని, ఎన్నాళ్ళయింది, కఠినం, ఎప్పుడొస్తావు నాన్న, ఆర్ధ్రం, మర్చిపోకూ, సంఘర్షణ, తోడు, నేటి సమాజం, మట్టి  బంధం,నిశబ్దం ధ్వనిస్తే వంటి కవితలు సమాజంలో మానవ సంబంధాలు, అనుభూతులు, ఆప్యాయతలు, ప్రేమానురాగాల, కుటుంబ విలువలు తెలియజెప్తాయి. చివరిగా నా అక్షరాలు కవిత తిలక్ అక్షరాల్లా వెన్నెల్లో ఆడుకునే అందమైన అమ్మాయిలు కాకపోయినా ఒక్కోసారి గ్రీష్మంలో ఆహ్లాదాన్నిచ్చే చిరుజల్లులు కదా... అని మన అంగీకారాన్ని సవినయంగా కోరుతున్నాయి...

మహిది ఆలీ గారు మరిన్ని అందరి మనసులకు చల్లదనాన్నిచ్చే చిరు అక్షర కావ్యాల ముత్యపు చినుకులు మన ముందుకు తేవాలని కాంక్షిస్తూ... అభినందనలతో ఈ "నాలోని నువ్వు" కవితా కన్నియకు అభినందనలు....!!

22, నవంబర్ 2017, బుధవారం

తెలుగు గురించి నాలుగు మాటలు...!!

నే రాసిన తెలుగు గురించి నాలుగు మాటలు ఈరోజు ఆంధ్ర ప్రభ వార్తాపత్రిక లో చోటు చేసుకున్నాయి. దానికి కారణమైన సుబ్రహ్మణ్యం గారికి,  వారిని పరిచయం చేసిన సూర్య ప్రకాశరావు  గారికి, సంపాదక  వర్గానికి నా ధన్యవాదాలు.....

http://epaper.prabhanews.com/m5/1439603/Hyderabad-Main/22.11.2017-Hyderabad-Main#page/4/1

17, నవంబర్ 2017, శుక్రవారం

చేజారిన చేవ్రాలు....!!

కన్నీరింకిన కనుదోయి
కలత పడుతున్న మనసు
కల'వరాల' నడుమ ఊగిసలాడుతున్నాయి 

అపసవ్యపు జీవితాలు
అర్ధాంతరపు బతుకులు
అడ్డదిడ్డంగా అడుగులేస్తూ తడబడుతున్నాయి

పరుగులెత్తే క్షణాల కాలం
మరచిన గతాల గురుతులు
మరలనివ్వని గుండె సవ్వడులైనాయి

చేజారిన చేవ్రాలు వెక్కిరిస్తూ
వీడని చిక్కుముళ్ళైన వాస్తవాన్ని
వద్దని వారిస్తూ వాపోతోంది...!! 

నా మొదటి పుస్తకం ఆవిష్కరణ.... !!

నా మొదటి పుస్తకం ఆవిష్కరణ....
https://www.youtube.com/watch?feature=youtu.be&v=qBbcXOQBI9Q&app=desktop



15, నవంబర్ 2017, బుధవారం

ఏక్ తారలు..!!

1.  మనసు బాధను మాయం చేస్తున్నా_మౌనగానాన్ని ఆలపిస్తూ...!!

2.  దైవమూ చిన్నబోతోంది_మానవత్వం మరచిన మనుష్యులను చూస్తూ..!!

3.  మనసు విప్పే గుట్టులెన్నో_మౌనం మాటాడితే..!!

4.  అనురాగాక్షతలు ఆశీర్వదిస్తున్నాయి_నవ్వుల సందళ్ళ నడుమ...!!

5.   మనసు చెప్పని సంగతులెన్నో_ఘనీభవించిన అనుభవసారాల్లో...!!

6.  మనసు సున్నితమే_మాటలే కఠినం..!!

7.  తరగని పెన్నిధి_తలపుల సందడి..!!

8.  కన్నీళ్లు తీర్చే బరువులెన్నో_మది భారాన్ని తగ్గిస్తూ... !!

9.  నవ్విన కాలమే నగుబాటైంది_ఋతువుల అందాలు తిలకించి...!!

10.  కలవరాలన్నీ కనుమాయం_ఆనందభాష్పాలు ఆదరిస్తుంటే...!!

11.   ఎదురుచూపుల ఎదలు నిండాయి_కలలు వరాలై కనువిందు చేస్తుంటే...!!

12.   మౌనానికి మెాహమాటం_మాట్లాడితే ఎవరేమనుకుంటారోనని...!!

13.  సమన్వయమెుక్కటి చాలదూ_సామరస్యంగా బ్రతకడానికి...!!

14.  నినదించని వేదనలెన్నో_మౌనమైన మదిలో...!!

15.  గుప్పెడక్షరాలను గుట్టగా పోశా_నీ పేరే రాస్తాయని తలచి...!!

16.   అప్పు రేపటికని వాయిదా వేయమన్నా_మరో గుప్పెడక్షరాలను ఏరేద్దామని..!!

17.   నీవే నా భావాలకు అల్లిక_అక్షరాలను అందంగా అమర్చుతూ...!!

18.   రాగద్వేషాలకతీతం_ఆత్మానందం పరమానందమైనప్పుడు...!!

19.  చిక్కిన ఓ చుక్క మేలిముత్యమై మెరిసింది_నీ చెలిమి గూటికి చేరినందుకేమెా..!!

20.   నీ కరుకైన మనసుకు సాక్ష్యాలుగా_చెదరని శిలాక్షరాలై నిలిచాయి..!!

21.  శూన్యాన్నీ అలంకరించాయి_భావాక్షర నక్షత్రాలు..!!

22.  మౌనమే రక్ష_సమస్యల చట్రం నుండి బయట పడటానికి... !!

23.  ఎన్నిసార్లు చదివినా కొత్తదనమే_జీవిత పుస్తకం అయినందుకేమెా...!!

24.  స్మృతుల శకలాలే అన్నీ_మృత్యునినాదాలై వెంటబడుతూ...!!

25.   మనసు మౌనాన్ని వింటున్నా_గుప్పెడు గుండెను అక్షరాల్లో అమరుస్తూ... !!

14, నవంబర్ 2017, మంగళవారం

ఉన్నత వ్యక్తిత్వం ...!!

 నేస్తం,
       ఆస్తులు అందరు సంపాదిస్తారు కానీ వాటిని సద్వినియోగ పరిచేది కొందరే. ఆ కొందరిలో నాకు అత్యంత సన్నిహతులు కృష్ణకాంత్ గారు ఉండటం నాకు చాలా సంతోషకరమైన విషయం. జీవితంలో ఎన్నో ఒడిదుడుకులను ఎదుర్కొని ఈరోజు పదిమందికి ఉపాధి కల్పించే స్థాయిలో ఉన్నారంటే అది వారి నిరంతర కృషికి నిదర్శనం. మాటలు అందరు చెప్తారు కానీ చేతల్లో ఎంతమంది చేస్తున్నారు అంటే వేళ్ళ మీద లెక్కబెట్టవచ్చు. ప్రొగ్రెసివ్ ప్రెస్ లో పనిచేసే ఎవరినడిగినా కృష్ణకాంత్ గారి గురించి చెప్తారు. తన కింద పనిచేసే వారిని కూడా కుటుంబ సభ్యులుగా చూసే ఉన్నత వ్యక్తిత్వం వారిది. తన మాటలతో ఎంతోమందికి ధైర్యాన్నిచ్చి వారికి అండగా నిలబడిన మంచి మనిషి. 
పాపకు ఆరోగ్యం బాలేనప్పుడు వారు పడిన మానసిక ఆవేదన మరొకరు పడకూడదని తనకు తోచిన సాయాన్ని ప్రతి సంవత్సరం కొందరికి అందిస్తూ, తన ఉద్యోగుల పిల్లల చదువులకు సాయపడుతూ, అనుబంధాలను, అభిమానాలను అందరితో కొనసాగిస్తూ ఎంత ఎదిగినా ఒదిగియున్న నిగర్వి. 
      ఇంజనీరింగ్ చదువుకునే రోజుల్లో పరిచయం, మాటలు తక్కువే మా మధ్యన. కానీ అన్నింట్లో  అండగా నిలబడుతూ, ఈ రోజుకి అదే అభిమానాన్ని అందిస్తున్న ఆత్మీయులు. చాలామంది నేను, నా కుటుంబం అనుకునే ఈరోజుల్లో, పలకరిస్తే ఏం అడుగుతారో అని చేసిన సాయాన్ని కూడా మరిచి మొఖం చాటవేస్తున్న బంధువుల, స్నేహితుల నీచపు నైజాలున్న సమాజంలో నీకు ఏం చేయడానికైనా సిద్ధం ఎప్పుడూ అని అండగా నిలబడిన వ్యక్తి. 
అటు కుటుంబానికి , ఇటు సమాజానికి  తనకు చేతనైన రీతిలో తన వంతుగా చేయి అందిస్తున్న కృష్ణకాంత్ గారు నాకు హితులు సన్నిహితులు కావడం చాలా గర్వంగా ఉంది. 

12, నవంబర్ 2017, ఆదివారం

గూడు లేని న్యాయం..!!

ఎండకు ఎండుతూ
వానకు తడుస్తూ
నిప్పుల్లో కాలుతోంది

అధికారానికి తలొగ్గి
ధనం చేతిలో కీలుబొమ్మై
కళ్ళు లేని  కబోధిగా మారింది

నిజాలను వింటూ
అబద్దాలను నమ్ముతూ
అంధకారంలో మునిగిపోతోంది

రావణ కాష్ఠాల నడుమ
రామరాజ్యం కోసం
ఎదురుతెన్నులు చూస్తోంది

అంగడిబొమ్మలా అమ్ముడుబోతూ
అర్ధనగ్న నైతిక విలువల్లోబడి
అల్లాడుతోంది ఈనాటి న్యాయదేవత...!!

9, నవంబర్ 2017, గురువారం

అర మనిషి..!!

మానవ అద్భుత మేథాశక్తికి
మరో రూపమైన  యంత్రాల చేతిలో
కీలుబొమ్మలౌతున్న జీవ చైతన్యం
సృష్టికి ప్రతిసృష్టి చేస్తున్న విజ్ఞానం
కొత్త పుంతల ఒరవడిలో పడి
యాంత్రికతగా మారుతున్న
నేటి సగటు మనిషి జీవితాలు
పరిపూర్ణ మానవుని నుంచి
అసంపూర్ణ ఉనికిగా మారుతున్న
పరిణామ క్రమాన్ని స్వాగతిస్తున్నంత కాలం
కొడిగడుతున్న అనుబంధాలు
రెప రెపలాడుతూనే ఉంటాయి. 

2, నవంబర్ 2017, గురువారం

గాంధీ పుట్టిన దేశమా ఇది...!!

ఆచార సంప్రదాయాలకు
ఉపనిషద్వేదాలకు నిలయమైన
భరతావని కన్న ఆణిముత్యం గాంధీ

అర్ధరాత్రి స్వతంత్రాన్ని స్వాగతించి
స్వరాజ్యపు బావుటానెగురవేసి
అహింసాయుధాన్ని పరిచయం చేసిన ప్రథముడు

అరాచకాలకు అక్రమాలకు ఆలవాలమైన
ఈనాటి భారతంలో మహాత్ముడు మళ్ళి పుడితే
అభాసుపాలౌతాడేమో జాతిపిత

సస్యశ్యామల సుందర స్వతంత్ర భారతాన్ని
కలలుగన్న శాంతి సుధాముడు నివ్వెరపడి నొచ్చుకుంటాడేమో
ప్రగతి పథంలో దూసుకెళుతున్న స్వరాజ్యాన్ని..!!

ద్విపదలు...!!

1.  నా ఖాళీలన్నీ పూరించబడ్డాయి
నువ్వు విసిరెళ్ళిన జ్ఞాపకాలతో....!!

2.  వెలితి నింపాలన్న యత్నమే
వెలుగు తోడ్కొని తెచ్చి...!!

3.   వేగానికి కళ్ళాలేసాయి
ఎగిసి పడతున్న జ్ఞాపకాల వన్నెలు....!!

4.  తలపులు తల్లడిల్లుతున్నాయి 
   మూసిన రెప్పల వెనుక మౌనాలందక....!!

5.  అంతం లేనివే ఆలోచనలు
అగాధాలను అవలీలగా మెాసేస్తూ..!!

6.  మూసిన రెప్ప మాటునే
రేపటి స్వప్నం చేరింది... !!

7.  మనసు నీతో ముచ్చట్లాడుతోంది 
నా వాస్తవమూ వర్తమానమూ నువ్వేనని గతాన్ని  బుజ్జగిస్తూ..!!

8.   మనసుకూ మమకారమే
మౌనంమాట ఆలకించాలని...!!

9. నీ నిశ్శబ్ధాన్నీ ఆస్వాదిస్తా  
నా మనసంతా నీవైతే..!!

10.   మనసు మౌనం జతకడితే
మాటల సందడి మాయమేగా....!!

11.   మనసంతా నిన్నే నింపుకున్నా
మౌనంలో నీకు చోటిస్తూ...!!

12.  ఏకాంతం పలకరించిందేమెా
ఒంటరితనానికి ఊరటనిస్తూ...!!

13.   ఆత్మీయత అభాసుపాలౌతోంది
నకిలీ స్నేహాల నయవంచనలో పడి...!!

14.  శూన్యానిదెప్పుడూ దొడ్డ మనసే
అన్నింటిని తనలోనికి ఆహ్వానించేస్తూ...!! 

15.   అడుగులు తడబడుతున్నాయి
గమ్యాన్ని చేరలేమేమెానని...!!

16.   అతిశయమే నాది
స్వాతిముత్యంతో నెయ్యమందినందుకు..!!

17.  వెలుగులన్నీ చేరుతున్నాయి
చీకటిని చెరిపేస్తూ... !!

18.  ఆకాశమే నీ పాదాక్రాంతం
సడలని నీ మనోధైర్యానికి...!!

19.  మమత తోడైంది
మనసును బ్రతికించడానికి....!!

20. ఆంతర్యంలో అంతరార్థమెరుకే
గమ్యం చేరేందుకై..!!

21.   జ్ఞాపకం గమనిస్తోంది
గతానికి వర్తమానానికి జత కలపాలని...!!

22. ఏకాంతమెప్పుడూ నేస్తమే
 అలసి సొలిసిన జీవితానికి...!!

23.  ఆత్మీయతెప్పుడూ ఒంటరే
బంధాలకు బందీయై.. !!

1, నవంబర్ 2017, బుధవారం

నీతులు చెప్పేందుకే...!!

నేస్తం,
         ఏంటో ఈమధ్య కొందరు ఎదుటివాళ్ళ తప్పులు వెదకడంలో బాగా ఆసక్తిగా ఉంటున్నారు. నీతులు చెప్పేందుకే కానీ ఆచరించేందుకు కాదు అని ఋజువు చేస్తూ ఒక వేలు ఎదుటివారిని చూపిస్తే మిగతా నాలుగు వేళ్ళు తమనే చుపిస్తున్నాయన్న చిన్న విషయాన్ని మర్చిపోతున్నారు. ఓ నాలుగు సన్మానాలు, కాసిన్ని బిరుదులూ వచ్చేస్తే చాలు ప్రతి ఒక్కరి రాతల్ని విమర్శించడమే పనిగా పెట్టుకుంటున్నారు. ఆ బిరుదుల, సత్కారాలు వెనుక ఏముందో నలుగురికి తెలుసన్న చిన్న విషయాన్ని మర్చిపోతున్నారు.
    కవిత్వంలో ప్రక్రియలకి నిర్దిష్టమైన నియమాలేమి లేవు. భావాన్ని చెప్పే విధానం, పాఠకులని ఆకట్టుకునేలా ఉంటే చాలు. అవార్డులు, రివార్డులు రాని ఎంతోమంది చక్కని భావాల్ని నలుగురు మెచ్చే విధంగా రాస్తున్నారు. వచన కవిత్వం ఇలానే ఉండాలని, వ్యాసం ఇలానే రాయాలని ఎవరు చెప్పలేదు. మనం తీసుకున్న వస్తువుని ఎలా చెప్పగలం అన్నది మన భావుకత మీద ఆధారపడి ఉంటుంది. ఒకే వస్తువుని ఎంతమంది రాసినా ఏ ఇద్దరిది ఒకేలా ఉండదు. మాతృస్పర్శ కవితా సంకలనంలో అమ్మ గురించి వందకు పైగా కవులు తమ కవితలను రాశారు. ఏ ఒక్కరిది మరొకరి కవితతో పోల్చదగినదిగా లేదు. ఈ  సృష్టిలో అమ్మ ఎవరికైనా అమ్మే మరి రాసే భావాల్లో ఎన్నెన్ని తేడాలో.
      లోపం చూసే మన దృష్టిలో ఉంది. కొందరు ఆధ్యాత్మికతను హేళన చేస్తున్నారు, మరికొందరు తమ మతమే గొప్పదని అంటున్నారు. పూజలు,  పునస్కారాలు చేసేవాళ్ళు, చేయనివాళ్ళు ఇద్దరు ఉంటారు. అంట మాత్రాన పూజలు చేసే ప్రతి ఒక్కరు మంచివాళ్ళూ కాదు, చేయనివాళ్ళు చెడ్డవాళ్ళు కాదు. ముఖపుస్తకంలో దేవుళ్ళ బొమ్మలు పెట్టేసి నాలుగు సూక్తులు చెప్పేస్తే వాళ్ళు అపర ఆధ్యాత్మిక గురువులు కాలేరు. ఓ నాలుగు దేశభక్తిని చాటిన  నాయకుల చిత్రాలు, ఓ రెండు దేశభక్తి గీతాలు రాసినంత మాత్రాన వారు దేశభక్తులైపోరు. రాజకీయ నాయకుల తప్పులను ఎత్తిచూపితే అడవిలో అన్నలూ కాదు.
   ఎవరికివారు తమను తాము సగటు సమాజజీవిగా ప్రశ్నించుకుంటే అన్ని ప్రశ్నలకు సమాధానాలు దొరుకుతాయి. ఎవరి ఇష్టాలు వారివి, ప్రక్క వారికి ఇబ్బంది కలిగించకుండా తమ తమ పనులు చేసుకుంటే అందరికి మంచిది. ఎంతసేపు ఎదుటివారిలో లోపాలు వెదకడానికే మీ సమయాన్ని వెచ్చించకండి, మీకోసం కూడా కాస్త సమయాన్ని కేటాయించుకోండి. ఎదుటివారి భావాలకు కాస్త విలువ ఇవ్వండి. నైతికతను మర్చిపోకుండా మెలగండి. అందరు బావుంటారు.


31, అక్టోబర్ 2017, మంగళవారం

ఏక్ తారలు..!!

1.  విసుగు రావడంలేదెందుకో_భేషజాల్లేని చెలిమి మనదని కాబోలు...!!

2.  బాసలక్కరలేని బంధమే మనది_పది కాలాలు పదిలమంటూ...!!

3.  ఆహ్లాదంగా హత్తుకుంటున్నా_చినుకుల చిరునవ్వులను...!!

4. గమనానిదెప్పుడూ వెలుగు బాటే_తప్పటడుగులెన్ని వేసినా..!!

5.  వన్నెలన్నీ చిన్నబోతున్నాయి_వెన్నెలంత స్వచ్చమైన మన స్నేహాన్ని చూసి...!!

6.  జ్ఞాపకం ఓదార్చింది_మౌనం గాయపడితే... !!

7.  జీవితాన్ని నిలబెట్టింది_ఆలంబనగా నిలిచిన నీ ప్రేమ...!!

8.  వెలుగు రాదారిని పరిచా_క్రీనీడలకు తడబడకు నేస్తమా...!!

9.   సంతసాల అతిశయమే_ ఆత్మీయతానుబంధానికి దక్కిన గౌరవానికి...!!

10.  అద్దంలో ప్రతిబింబాలు మనవి_అంతంలేని అనుబంధానికి సాక్ష్యంగా...!!

11.  వాస్తవాల ఉరుములు_భవిష్యత్తును భయపెడుతూ...!!

12. మనసుకే అన్ని కష్టాలు_పాపమేమి చేసిందో...!!

13.   అక్షరాలన్నీ ఎనలేని సంపదే_దొంగిలించే వీలు లేకుండా...!!

14.  దుఃఖపు దారిని మళ్ళిస్తున్నా_సంతోషాలను చేరువ చేయాలని...!!

15.  విశేషాలతో నిండుతున్నాయి_జ్ఞాపకాల గదులన్నీ...!!

16.  నిరీక్షణకు స్ధానమే లేదు_మనసంతా నువ్వయ్యాక..!!

17.  చైతన్యానికి చేరువౌతున్నా_మరణంతో నిత్యం రణం చేస్తూ...!!

18.  గెలుపు అనివార్యం కావాలి_మానవత్వాన్ని స్వాగతించడానికి...!!

19.  శోకానికి తెలుసు_శ్లోకంలో  పోగొట్టుకున్నది దొరుకుతుందని...!!

20.  మనసు గేయం వింటున్నా_ అలంకృతమైన మౌనంలో...!!

30, అక్టోబర్ 2017, సోమవారం

ఏక్ తారలు..!!

1.  ఎందరున్నా ఏదో లోటే_నువ్వు లేని ఖాళీని పూరించలేక...!!

2.   హద్దులెరుగనిది మన స్నేహం_ఆకాశమే సాక్ష్యంగా...!!

నీరెండకు నిశ్శబ్ధానికి....!!


నీరెండకు నిశ్శబ్ధానికి స్నేహం
ఏకాంతమైయ్యింది ఎందుకో

ఒంటరితనానికి వలస వచ్చిన
జ్ఞాపకాల గువ్వల సందడెందుకో

సమస్యల చట్రాలు చుట్టుముట్టినా
పోరాట పటిమ తగ్గడంలేదెందుకో

చీకటి చుట్టమై చేరుతుంటే
నేనున్నానని వేకువ ఓదార్పెందుకో

గతపు గాయాలు గుచ్చుతుంటే
రేపటి భవితపై ఆశలెందుకో

దిగులు దుప్పటిలో దాగిన
చిరునవ్వులకు వెలుగెప్పుడో

రాలిపడుతున్న స్వప్నాల నడుమ
వెలసిన రంగుల కలలెన్నో

మాటలు రాని మౌనాల
మనసుచాటు వ్యధలెన్నో

ఓటమి పాఠానికి తెలియజెప్పే
గెలుపు చిరునామా ఎక్కడో

కాలంలో పోటీపడే బ్రతుకుల్లో
కాళరాత్రుల కోరల కాట్లెన్నో

రెప్పపాటు జీవితానికి
రెప్పపడని క్షణాలెన్నో...!!

26, అక్టోబర్ 2017, గురువారం

ఎటూ పోలేక...!!

తరతరాలుగా తరలి వస్తోంది
ఆకలి కేకల అరణ్యరోదన

నరనరాన వ్యాపిస్తోంది
నడతలేని సంప్రదాయం

దిగంతాలుగా వెలుగుతోంది
దుర్మార్గపు దురాచారం

మారుతున్న వ్యవస్థ మూగబోయింది
రంగుల రాజకీయ క్రీడల నడుమ

తడబడి తబ్బిబ్బవుతోంది
మార్పు కోరే మెుదటి అడుగు

అనుబంధాలు ఆవిరౌతున్నాయి
అలవికాని ధన దాహానికి

సర్దుబాటుకు సామాన్యుడు  తలవంచక తప్పడం లేదు
అవినీతి అందల మెక్కాక

సగటుజీవి బ్రతుకులు కన్నీటిలో కొట్టుకపోతున్నాయి
కార్పోరేట్ ఖజానాకి వైద్యం తాకట్టు పెట్టాక

బాబాలు పరమాత్ములయ్యాక
సంస్కృతి ధనం ముసుగుకప్పుకుంది

సాధించిన ప్రగతి కూడా
కులాల కంపు కొడుతూనే ఉంది

ఆధునికత దేశం నుదుట దిష్టిచుక్కయ్యింది
పేదరికం మూఢనమ్మకాలకు తలవంచుకుంటోంది

తలరాత మారని దైన్యం రైతుదయ్యాక
వాగ్దానాల ముండ్లకిరీటాలు మోస్తూనే ఉంటాడు

ఎదుగుతూనే ఉన్న దేశంలో
ఓట్లవరకే పరితమౌతుంది ప్రజాస్వామ్యం

బలిపశువులౌతున్న బడుగుజీవులు
ఆశలను రేపటికి వాయిదా వేసుకుంటూ

ఎటుపోలేక నిస్సహాయతలో నలగుతూ
కొత్తదనం కోసం కాస్త సంతృప్తి కోసం వేచి చూస్తూనే ఉన్నారు...!!

ఇద్దరి మనసు చప్పుడు ఈ కవిత... ఎలా ఉందో చదివి చెప్పండి...
మంజువాణి

ద్విపదలు...!!

1. ఎందరిలో ఉన్నా ఏకాంతమే
    నువ్వులేని క్షణాలను గుర్తుచేస్తూ...!!

2.  ఏ పిలుపుకి మురిసిన పుడమెా
పులకింతల ఝురిలో తడిమిన మైమరపులో...!!

3.   పలుకే బంగారమయ్యింది
వలపులో మునిగిన మది ముంగిట...!!

4.  మాటలన్నీ  ముుత్యాలే
మమకారం చేరువైనందుకేమెా...!!

5.   మౌన బాస చెప్పింది
జీవిత పుటలన్నీ నీతోనేనని...!!

6.  నీ స్నేహపరిమళం తాకింది
విడలేని అనుబంధమై చేరి...!!

7.  అగచాట్లు వగస్తున్నాయి
గమ్యం చేరే యత్నానికి నీ ఆసరా దొరికిందని...!!

8.  కనువిందు చేసిన స్వప్నాలెన్నో
వాస్తవానికి ధీటుగా ఊతమిస్తూ...!!

9.  ఉనికి మెుదలైందే అక్షరాలతో
అమ్మఒడి చేరిన పసిపాపలా....!!

10.   గాయాన్ని మరిపించాలనే..
స్నేహంతో  సేదదీరుస్తున్నా...!!

11.  నీవు నేను ఒకటేగా
మది తెలిపెను మనసుమాట...!!

12.   నీ చెలిమికి దాసోహమంటున్నాయి
పదాలన్ని పద పదమంటూ...!!

13.  ఊపిరే తానయ్యింది జ్ఞాపకం
ఊతమై ఉండిపోతానని బాసచేస్తూ...!!

14.   చిలకపలుకులే అన్నీ
చిరాయువై వర్ధిల్లుతూ..!!

25, అక్టోబర్ 2017, బుధవారం

ఇదేనా ప్రజాస్వామ్యం అంటే..?

 నేస్తం,
    మనకు ఏది కావాలన్నా మన సమాజంలో ప్రతి దానికి ఓ అర్హత ఉంటుంది. దేశాన్ని శాసించే రాజకీయాల్లో ఎందుకు లేదు..? డబ్బు, రౌడీయిజం ముఖ్యమైన అర్హతలుగా మన దేశ సామాజిక రాజకీయాలు నడుస్తున్నాయి. ఒక చిన్న ఊరి నుండి మొదలై ఇంతింతై వటుడింతై అన్నట్టుగా ఉన్నాయి. కాస్త పేరున్న స్కూల్ లో జాయిన్ అవడానికి తల్లిదండ్రి అర్హత అడుగుతున్నారు ఇప్పుడు. ఒకప్పటి సంగతి పక్కన పెడితే ఇప్పటి రాజకీయాల్లో ఎంతమంది నాయకులు న్యాయబద్దంగా, చట్టబద్ధంగా గెలుస్తున్నారు..? డబ్బు, అధికారం కోసం ఒక పార్టీలో గెలిచి మరో పార్టీ లోనికి మారడం ఎంత వరకు సమంజసం..? వ్యక్తుల మీద అభిమానాన్ని చంపుకుని కొందరు పార్టీ కోసం ఓట్లు వేసి గెలిపిస్తే, గెలిచాక పార్టీ ఫిరాయిస్తున్న ఎందఱోనాయకులు. అప్పుడు ప్రజల తీర్పుకు తల ఒగ్గింది ఎక్కడ. ఇదేనా ప్రజాస్వామ్యం అంటే..? నాయకులు వారి వారి స్వప్రయోజనాల కోసం ఎన్నో మార్పులు, చేర్పులు చట్టాల్లో చేస్తున్నారు, కానీ ప్రజల కోసం ఎన్నుకోబడే ప్రతినిధుల అర్హత కోసం ఎందుకు నియమాలు పెట్టడం లేదు. ఎదో ఓటేశాము, ఎవరో ఒకరు గెలిచారు మన పని అయిపోయింది అనుకుంటున్నంత కాలం మనము, మన సమాజమూ ఇలానే ఉండిపోతాం. మార్పు మనలోనే మొదలు కావాలి.... !!

24, అక్టోబర్ 2017, మంగళవారం

పుట్టినరోజు సందడి...!!






పసిడి వెన్నెల నవ్వుల పసి పాపాయి ఆన్యకి పుట్టినరోజు శుభకామనలు 

నాలుగో తరం యువరాణికి శుభాభినందనలు 

ప్రేమతో
మూడు తరాల ఆత్మీయులు 

23, అక్టోబర్ 2017, సోమవారం

జీవన "మంజూ";ష (3)...!!

నేస్తం,
        హక్కులు, బాధ్యతల నడుమ కొట్టుమిట్టాడుతున్న మధ్యతరగతి జీవితాలు మనవి. పాత కొత్త తరాల మధ్యన నలుగుతూన్న అనుబంధాలకు వారసులం. బాధ్యతలకు కట్టుబడి బంధాలను వదులుకోలేని బాంధవ్యాలకు బానిసలం. దూరమై పోతున్న చుట్టరికాలను చూస్తూ, తరిగిపోతున్న ఆత్మీయతలు కోసం అల్లాడుతు అక్కడక్కడా దొర్లుతున్న మమతలను పదిలంగా దాచుకోవాలని ప్రయత్నిస్తున్న అతి సామాన్యులం. ఒకప్పటి ఉమ్మడి కుటుంబాలకు ప్రతిరూపంగా అరకొరగా మిగిలిన అనుబంధాలు వెలవెల బోతున్నాయి. ఇవి అన్ని చూస్తూ ఏమి చేయలేని నిస్సహాయ స్థితిలో నిలిచిన అస్సహాయులం.
        క్రొత్తగా మారిన విలువలతో, వింతైన జీవన విధానాలు మింగుడు పడక అటు పాత తరానికి, ఇటు కొత్త తరానికి మధ్యన మిగిలిన అసంపూర్ణ జీవితాలై పోయాయి. తోడబుట్టిన బంధాలను, తోడుగా వచ్చిన తోడును అపహాస్యం చేస్తూ కాపురాలను, కట్టుబాట్లను నడిరోడ్డున పడేస్తున్న అహంకారపు మదగజాలను భరిస్తున్న ఎందరో అమృతమూర్తులు కన్నీళ్ళను కాననీయక, బడబానలాన్ని దిగమింగుతూ చిరునవ్వుల చాటున వెతలను దాచేస్తూ, అహానికి తలను వంచుతూ బతుకు బండిని  వెళ్లదీస్తున్నారు. మానవతా విలువలతో కూడిన క్రొత్త శకానికి నాంది పలికే రోజు కోసం ఎదురుచూస్తూ... !!
ఇప్పటికి ఈ ముచ్చట్లకు సశేషం. 
       

21, అక్టోబర్ 2017, శనివారం

ద్విపదలు...!!

1.   ఎదురుచూపులు అలవాటేనట
మాటల మౌనానికి...!!

2.  మధుర స్వరాలు మనవే
నీ నా తేడాలెందుకు...!!

3.  మమతలన్ని నీతోనే
గాయాలన్నింటిని మాన్పేస్తూ..!!

4.  మూన్నాళ్ళ ముచ్చటే
ఏడడుగుల బంధం ఎగతాళి చేసాక....!!

5.   అద్దిన వర్ణాలన్నీ
దరహాసాల్లో మెండుగా కనువిందు చేస్తూ...!!

6.  అమాస తడబడుతోంది
నెల పొడుపు వెలుగుతో తేలిపోతానని...!!

7.    బుద్దులు పెడత్రోవనే
నట్టింట ఇల్లాలిని నవ్వులపాలు చేస్తూ...!!

8.  కాంతినద్దింది అక్షరం
మలినం కాని పరమాత్మ తేజంతో....!!

9.  మరణ శాసనం రాయాలి
ఋణపాశాలు వెంట పడకుండా....!!

10.   పరవశిస్తూ ప్రకృతి
ప్రణమిల్లుతూ ప్రణయం..!!  

11.   మరపురానివి జ్ఞాపకాలు
మనతో మమేకమైపోతూ...!!

12.  నిశ్శబ్దమెప్పుడూ నేస్తమే
నా ఏకాంతాన్ని నీతో జతచేస్తూ...!!

13.  జ్ఞాపకాలను వదలలేకున్నా
నువ్వు లేని రేపటికి రాలేకున్నా...!!

14.  ఊపిరే నీవుగా
ఉండి పోయావు ఎద నిండుగా...!!

15.  అనుభవాల వర్షమే జీవితం
హర్షాలన్నీ మనవి రాకున్నా...!!

16.   మనసంతా నేనైతే
మౌనానికి చోటెక్కడ....!!

17.   శబ్దం చుట్టమైంది
మన కలయికలో మాధుర్యాన్ని గ్రోలి.. !!

18.   అక్షయపాత్రే మన బాంధవ్యం
చెలిమి సంతసాలతో విలసిల్లుతూ...!!

19.  ఆశలు రేపింది ఎదకు
తోడై కడవరకు కలిసుంటానని..!!

20.  కన్నీటిని పన్నీరుగా మార్చేస్తూ
జీవిత నౌకను నడిపించడమే..!!

21.   విచలితమౌతుానే ఉన్నా
శూన్యాన్ని సైతం నువ్వే ఆక్రమిస్తుంటే...!!

20, అక్టోబర్ 2017, శుక్రవారం

అంతర్లోకాలు....!!

కనిపించని లోకాల్లో
వినిపించని కథనాలు

తెరచిన రెప్పల్లో
తెలియని భావాలు

మూసిన గుప్పిట్లో
దాగిన సూర్యోదయాలు

వెలితి పడుతున్న బంధాల్లో
వెతల సంకలనాలు

గతించిన గతాల్లో
గమనించలేని గురుతులు

అలసిన ఆత్మ నివేదనల్లో
మిన్నకుండి పోయిన అంతర్లోచనాలు....!!

19, అక్టోబర్ 2017, గురువారం

స్నిపెట్స్....!!

1.  మనసు ఉలిక్కి పడుతోంది
మౌనం అర్ధం కావడం లేదని...!!

2.  శబ్దాలంకారాలెన్నో
మౌనం దాల్చిన మనసుకు...!!

16, అక్టోబర్ 2017, సోమవారం

ద్విపదలు..!!

1.  చీకటి స్వప్నాలే అన్నీ
వెలుతురు వర్ణాలు అంటనీయకుండా...!!
2.  అనుభవాల ఆస్వాదనలో నేను
కలల సాగరంలో తరిస్తూ... !!
3.  చీకటి చుట్టమైంది
కలల హరివిల్లై నువ్వు కనిపిస్తావని...!!
4.  మౌనమే మారణాయుధం
మనసుని గాయపరచడానికి...!!
5.   మర్మాలన్ని మనకెరుకే
మౌనం మాటాడుతుంటే...!!
6.  కన్నీటికర్ధం తెలియని జన్మది
అమ్మ రుథిరాన్ని అమ్మేస్తూ...!!
7.  నిరీక్షణో వరం
నిన్ను చేరే క్షణాల కోసం..!!
8.   సమర్ధింపు అసమర్ధమైంది
అన్యులకు చోటిచ్చినందుకు...!!
9.   మనసు విప్పుతూనే ఉంటాయి
మాటలు మౌనాలై మిగిలినా..!!
10.  మృగ్యమైన ఆత్మలు
మానవరూపంలోనున్న మృగాలకు..!!
11.  ఆశ్చర్యమే ఎన్నటికీ
ఆశించని ఆత్మీయతలెదురైనప్పుడు..!!
12.  అతిశయం అక్షరాలదే
అన్నింటా తనదే పైచేయి అయినందుకు...!!
13.  శబ్దం చేరువౌతోంది
నిశబ్దానికి వీడ్కోలిస్తూ...!!

ఏక్ తారలు...!!

1.  వయసుడిగినా అందమే_ఆత్మీయత నిండిన జీవితాల్లో...!!

2.  ధనాత్మకమైనాయి_అరువు తెచ్చుకున్న అనుబంధాలు..!!

3.  హర్షపు చిరుజల్లులే అన్నీ_నీ స్నేహంలో సేదదీరాక...!!

4.  అపాత్రదానపు ప్రేమలు_అందుకోలేవు ఆత్మీయతాస్తాన్ని...!!

5.   అమ్మదనం అలానే ఉంది_అనాధలకు ఆలంబనౌతూ...!!

6.  లెక్కకు తేలని శేషమే_ప్రేమ రాహిత్యంలో మునిగి...!!

7.  రాహిత్యాన్నీ పెంచుతుంది_అందీ అందని ప్రేమ..!!

8.  అక్షరం అక్కునజేర్చుకుంది_అమ్మలా ఆసరానందిస్తూ...!!

9.   పరిచయం పాతదే_సరి కొత్త పరిమళాన్ని వెంట తెస్తూ...!!

10.  వలపెంత పంచాలో_బంధం బలపడటానికి....!!

11.  అనుభూతుల అశ్వాలే అన్నీ_అక్షరాల రథాన్ని అధిరోహిస్తూ...!!

12.   మనో గవాక్షం తెరచుకుంది_నీ వలపు అలికిడికి....!!

13.  మది తలుపులు తెరిచే ఉన్నాయి_నీ తలపు రాక కోసం...!!

14.  గమ్యం పరిచితమే_ఆటుపోట్ల రుచి చూసాక...!!

15.   అక్షరాల అలికిడిలో జీవిస్తున్నా_వాస్తవాలను విశదీకరిస్తూ....!!

16.   సాక్ష్యాలన్నీ సజీవాలే_అక్షర లక్షలకు ప్రణమిల్లుతూ....!!

17.  శృంఖలాలకు ఆటవిడుపే_అక్షర యుద్ధంలో గెలిచిన భావాలతో.... !!

18.  ఇలా వెళిపోయింది కాలం_నీ తలపులను తోడ్కొని..!!

19.  జరిగిపోయిన కాలంలో_జ్ఞాపకాల జలతార్లు...!!

20.  కనువిందు చేసిన స్వప్నాలెన్నో_
వాస్తవానికి ఊతమిస్తూ...!!

15, అక్టోబర్ 2017, ఆదివారం

ఇట్లు... నీ... పుస్తక సమీక్ష...!!

ముఖపుస్తక మిత్రురాలు గాయిత్రి కనుపర్తి గారి ఇట్లు...  నీ... పుస్తకం గురించి చెప్పాలంటే..
ముందుగా పుస్తకాన్ని చూడగానే ఆకర్షించే ముఖ చిత్రంతో కనిపించింది. కాస్త లోపలి పేజీలు తిరగేయగానే అందమైన చిత్రాలతో అర్ధవంతమైన కవితా భావజాలాలు ఆర్తిగా పలకరించాయి. ఇట్లు... నీ... అన్న పేరులోనే అంతర్గతంగా పరిచిన ఓ ఆత్మీయత, ప్రేమపూర్వక అక్షరాల అక్షింతలు మనకు కనిపిస్తాయి.
మొదటి కవనంలోనే ఆరు కాలాల అలరింపులని అందంగా అందిస్తూ వాసంతాల వనవాసం నుంచి పరితాపాల గ్రీష్మంతో పలకరించి చినుకుల సందడిని స్పర్శిస్తూ వర్షాన్ని, విరహాన్ని ఓదార్చే శరత్తును తాకి, చల్లని సమీరంగా హేమంతాన్ని, రాలుపూల శిశిరపు సవ్వడిలో ఆరు ఋతువుల ఆనందాలను కానుకగా చేసి అందించడంలోనే భావాలను అద్భుతంగా పండించారు పుస్తకానికి తగ్గ పేరును సార్ధకం చేస్తూ.  తలపుల నెమలీకలు ఎడబాటులో జ్ఞాపకాల పరిమళాలు యుగళ గీతాలుగా వినిపిస్తాయి. నీవెవరివో కదా అంటూనే.. ఎవరు నీవంటే అని జీవిత తోటమాలిని ఆద్రతగా అడుగుతారు. రాత పుట్టుకని రెప్పపాటు కాలానికి కనికట్టుగా వర్ణిస్తారు. రమ్మని పిలవకుండానే వచ్చిన అతిథిని రాకోయి అనుకోని అతిథీ అంటూ ఆహ్వానిస్తారు. మనసుకి హెచ్చరికలు చేస్తూనే మానసాన్ని మేల్కొలుపుతారు. ప్రణయ వీణ సరిగమల్లో సరాగాలను,నవరాగా మాలికలను అన్వేషిస్తారు. బ్రతుకు అంతర్ముఖాన్ని అద్దంలో చూపిస్తారు. ఊహాలోకంలో మనసులో గీసుకున్న ప్రకృతి చిత్రాన్ని మనోజ్ఞంగా చూపిస్తారు. కళల తీరంలో ఏకాంతపు రాణివాసాన్ని వాస్తవ కలల విహారంలో ప్రణయ కావ్యంలో వేచి చూసే అభిసారికను చూపిస్తారు. తొలకటిలో తొలి వలపుని, అక్షరసావాసంలో నిరీక్షణల ఆరాటాన్ని, వెన్నెల పుష్పంలో వలపులని అందించే ఏకాంతపు కాంతని, క్షణాలు సాక్షిగా కాలాన్ని నిలిచి పొమ్మంటూ నెమలి కన్నుల కలని నిజం చేయమని ప్రేమార్థిగా శోధిస్తూ కన్నీళ్లను కారణమడుగుతూ, వన్నెల వసంతంలో వెన్నెల కొంటెతనాన్ని ఊహల సవ్వడిలో ఏకాంతపు సంకెళ్లను వివరిస్తూ, ప్రేమ దివ్యత్వాన్ని పలవరిస్తూ, వడిలో వాలిన క్షణాలను వల్లె వేస్తూ, అర్ధంకాని పుస్తకమని ఎందరన్నా నాకే తెలియని నేను ని మనసులోని మనసుకు పరిచయిస్తూ, ఆత్మైక్యంలో మమేకమై, మనసు మజిలీకి శాశ్వత క్షణాలను లెక్కలేస్తూ, జ్ఞాపకాల పారిజాత పరిమళాలను ఆఘ్రాణిస్తూ, తలవని జ్ఞాపకాన్ని తలపుల్లో దాచుకుంటూ, మౌన సవ్వడిని హృదయ సవ్వడిగా కలసిన మనసుల సాక్షిగా అనుబంధంగా ప్రమాణం చేద్దామా అని అడుగుతారు. అంతరంగ రణరంగాన్ని,పాణిగ్రహణానికి పరమార్ధాన్ని, అక్షర నిరీక్షణలో అవ్యాజమైన ప్రేమార్తిని, వలపు వనమాలిలో ఒంటరి గీతాన్ని, ఎదురుచూపుల కథను, మైమరపుల ఆరాటాన్ని, అవ్యక్త మాధుర్యాన్ని, నిండైన నా మదంటూ గొంతు గడప దాటలేని భావాన్ని అలవోకగా అలా అలా ఎగసిపడే అలల వయ్యారంలో నిలిచిన గమ్యాన్ని, ఆశల ఆజ్యంలో చీకటి వెలుగుల సందె పొద్దుల్లో శ్రావణ మేఘాల ప్రణయ కావ్యాల మౌన భాష్యాలను లిఖించడంలో ప్రేమను మురిపించడమే కాకుండా చదువరులందరిని తన అక్షర సంద్రంలో, భావజాలాలతో మరిపించి మురిపించారు తనదైన శైలిలో. ఈ పుస్తకానికి సమీక్ష రాయడంలో ఎంత వరకు కృతకృత్యురాలని అయ్యానో తెలియదు కానీ చదువుతున్నంత సేపు ఓ చల్లని పైరగాలి పలకరించినట్లు అనిపించింది.
అందమైన భావుకతతో, అర్ధవంతమైన చిత్రాలతో ఇట్లు... నీ... కవితా సంపుటి అందరిని అలరిస్తుందని ఆశిస్తూ..
గాయిత్రి కనుపర్తి గారికి అభినందనలతో... 
మంజు యనమదల

14, అక్టోబర్ 2017, శనివారం

ద్విపదలు...!!

1.  ధ్యాసంతా నీపైనే
ధ్యానానికి తావీయక...!!
2.  మనసు చెమ్మ
మదిని తాకింది....!!
3.  నాకెప్పుడూ నీ ధ్యాసే
మరలనీయని మనసు కళ్ళెంతో...!!
4.  భావనలన్నీ నీతోనే జత
మన బాంధవ్యానికి పోటిగా ...!!
5.   ఇలలో నిలిచి పోతుందిలే
మరుజన్మకు మళ్ళీ జతకడుతూ...!!
6.  కలతలెన్ని ఎదురైనా
కలవర పడదులే మన చెలిమి....!!
7.  కన్నీరింకి పోయింది
వేకువ వెన్నెల వెంట రాలేదని...!!
8.  రాటుదేలింది మనసు
మనిషి కర్కశత్వాన్ని కళ్లారా చూసాక....!!
9. రెప్పపాటు జీవితానికి
రెప్పపడనీయని అనుభవాలెన్నో...!!
10.  ఊరడింపుల తాయిలాలే
మరపులో ముంచేస్తూ...!!
11.   నిలిచిపోయిన స్వప్నం వెనుక
నిదుర లేని రాతిరులెన్నో..!!
12.  వేకువలన్నీ విశేషాలే
నిదురపోయిన రాతిరి కలల కబుర్లతో..!!
13.  వేకువ పిలిచింది
రాతిరి కలలు నిజం చేయమని..!!
14.   వర్ణాలన్నీ నీతోనే తిష్టేశాయి
చీకటికి సైతం వెలుగులద్దుతూ...!!

13, అక్టోబర్ 2017, శుక్రవారం

ఏక్ తారలు..!!

1.  అత్యల్పం జీవితం_చావు పుట్టుకల చేతిలో...!!

2.  అక్షరానికి ఆయువెక్కువ_అనంత భావాలకు ఆలవాలమౌతూ...!!

3.  అనునిత్యం నీతోనే_అనురాగం నేనై...!!

4.  అక్షరాల విరులే అంతటా_ఆత్మీయంగా అల్లుకుంటూ...!!

12, అక్టోబర్ 2017, గురువారం

ద్విపదలు..!!

1.  వాస్తవమై వద్దామనుకున్నా
కలగా కలిసి పోతానని తెలియక...!!

2. అనుసరణే నాది
అనుకరణలో నీతో...!!

3.  మెలకువలోనూ కలవే
మదిని వీడిపోవు....!!

4.  ప్రణయమిప్పుడు ప్రణవమైంది
ఆత్మానందం నాదైనాక....!!

5.  ఇరువురు ఒకటే కదా
ఒకరికి ఒకరు ఎరుకే...!!

6.  ఇలలోనూ నీదాననే
ఇంతిలా నిన్నలరిస్తూ...!!

11, అక్టోబర్ 2017, బుధవారం

ద్విపదలు..!!

1.  ఆస్వాదిస్తున్నా నీ చెలిమిని
మదిని నింపిన మౌనంలో...!!

2.  మనసు చెప్పింది
నీ మౌనాన్ని మాటల్లో తెలపమని...!!

3.  అలరించా అక్షరాన్ని
మౌనాన్ని ఛేదించాలని...!!

4.  చమత్కారానికి తెలిసింది
మౌనానికి మాటలెరుకని...!!

5.  మాటల గలగలలు
మౌనాక్షరాల చెలిమి సంగతుల సవ్వడులు...!!

6.   మౌనం అలిగింది
మనసు నీ మాయలో పడిపోయిందని...!!

7.  వీడను ఎన్నటికి
వాడని మన చెలిమి సాక్షిగా...!!

8.  వెలుతురు వాకిలికి వర్ణాలద్దుతున్నా
వెన్నెల పూలను పూయించాలని..!!

9.   మేలిముసుగు తొలగించా
పన్నీట స్నానమాడిన మనసని  తెలిసి....!!

10.  కలల రాదారి రమ్మంటోంది
కలవరాలను వదలి కరిగిపొమ్మంటూ...!!

11.  నీ మానసాన్ని తాకినందుకేమెా
ఈ చెలిమి పరిమళాలు...!!

బెర్ముడా ట్రయాంగిల్..!!

ఓ అంతు తెలియని
అగాధంలో పడిపోతున్నాయి
ఎన్నో ప్రాణాలు ఉసూరుమంటూ
ఆకర్షణో క్షణికావేశమెా
తెలియని స్థితిలో నలుగుతూ
బెర్ముడా ట్రయాంగిల్ లక్షణాల
నరునికి చిక్కిన జీవితాల
హాహాకారాలు రొద పెడుతుంటే
ఆ రోదనల స్వరాల ఆక్రందనలు
విననివ్వని సాగర ఘోషలో
కలిసిపోయిన శకలాలు
మెాసపోయిన నమ్మకానికి
అమ్ముడుబోయిన సాక్ష్యాలు
కోకొల్లలుగా కనుల ముందు నిలిస్తే
నాకెందుకని న్యాయం నిదురబోతోంది
గెలిచానని మృగం గర్వంగా
మరోసారి జూలు విదిలిస్తూ
మళ్ళీ వేటకు బయలుదేరింది...!!

10, అక్టోబర్ 2017, మంగళవారం

మార్పు..!!

నేస్తం,
        మనమున్నది ప్రజాస్వామ్య ప్రభుత్వంలో అని అనుకుంటే అది తప్పే అవుతోంది. పాలక పక్షమా,  ప్రతి పక్షమా అని తేడా లేకుండా ఎవరికి వారు న్యాయాన్ని ఉద్దరిస్తున్నారు. చిన్న చేప నుంచి పెద్ద చేప వరకు అందరు సమానమే.  మనం ఎన్నికల్లో నిలబడిన వ్యక్తి వ్యక్తిత్వాన్ని చూడకుండా పార్టీని బట్టి ఓట్లు వేస్తున్నాం చాలా వరకు, కాని వారు గెలిచాక అది తమ గొప్పతనమని భావిస్తూ అహాన్ని ప్రదర్శిస్తున్నారు.  దీని వలన పార్టీకి లాభనష్టాలు ఎంత అనేది మళ్ళీ ఎన్నికల్లో తేలిపోతుంది. 
ఉదాహరణకు  మా ఊరినే తీసుకుంటే పంచాయితీ స్ధలాన్ని ఆక్రమించిన ఎమ్ పి టి సి మేడం గారిని అడిగినందుకు పంచాయితీ ప్రెసిడెంట్ ముందే సదరు మేడం గారి భర్త గారు నానా రకాలైన తిట్లు తిట్టి రాళ్ళు విసిరి రెండుసార్లు కొట్టి మూడోసారి కూడ రాయి తీస్తే దగ్గరకు వెళ్ళి ఓ దెబ్బ వేసిన పాపానికి వేంటనే ప్రభుత్వ  ఆసుపత్రిలో రెండు రోజులు విశ్రాంతి తీసుకుని కాసిని కాసులు సమర్పించి దొంగ పత్రాలు తీసుకుని కేసు పెట్టారు. దీనిలో కొస మెరుపు ఏమిటంటే సాక్షులుగా పంచాయితీ ప్రెసిడెంట్ గారే. ఇదండీ మన ప్రజాస్వామ్యం.
మరో మాట ప్రెసిడెంట్ గారిని నాలాంటి వారొకరు మా వీధి రోడ్డు బాగా పోయింది కాస్త దాని సంగతి చూడండి అని అడిగితే వారి సమాధానం " నువ్వు ఎలక్షన్ లో పోటి చేయ్" అని. పార్టీ పేరు చెప్పి ఇలాంటి వారికి పదవులు అపాత్రదానం చేస్తే పార్టీకి పుట్టగతులుండవు. వారం రోజుల నుండి కోతులు ఊరిని అతలాకుతలం చేస్తుంటే ఈ నాయకుల కళ్ళకు కనపడలేదేమెా. పేరుకి మాత్రం అన్ని తమ ప్రతాపమే అని చెప్పుకుంటారు.   మా ఊరనే కాదు అన్ని పల్లెల పరిస్థితి ఇదే.
మరి మార్పు ఎక్కడ మెుదలవ్వాంటారు...?

Related Posts Plugin for WordPress, Blogger...
 

కబుర్లు కాకరకాయలు © 2008. Template Design By: SkinCorner